Оглас за селекција на 12 идни обучувачи во областа на законодавството и изработка на прописите

 

Министерството за информатичко општество и администрација и Мисијата на ОБСЕ во Скопје во текот на 2012 година го спроведуваат проектот насловен како „Изготвување на прописи и ex-post евалуација на законодавството.“ Преку првата компонента од проектот ќе  се спроведе нов циклус на обуки наменет за државните службеници, чија главна цел е јакнење на капацитетите на администрацијата во областа на создавањето, спроведувањето и евалуацијата на законодавството.

 

Обуката ќе биде спроведена врз основа на сеопфатна наставна програма која ги опфаќа следниве области од регулаторниот менаџмент: креирање на политиките, проценка на влијанието на регулативата, изготвување на прописите и номотехничките правила, следење и оценување на спроведувањето на прописите, усогласување на националното законодавство со правото на Европската унија и друго. Оваа наставна програма е развиена за почетно и напредно ниво, а истовремено ќе биде проследена со курс за учење на далечина (e-learning).  

 

Една од главните активности што ќе се спроведат во рамки на проектот е селекција на група од 12 лица за кои ќе биде организирана посебна обука за обучувачи. Оваа обука ќе изнесува четири дена (27-30 јуни 2012) и истата ќе ја спроведат меѓународен и национален консултант. Од учесниците во обуката за обучувачи ќе бидат селектирани и ангажирани идните обучувачи, кои ќе ја спроведат наставната програма преку циклус на тематски (каскадни) обуки наменети за останатите припадници на администрацијата. Секоја од каскадните обуки  ќе изнесува по 3 дена, така што преку целиот циклус ќе се обезбедат вкупно 12 дена обука. Идните обучувачи ќе ги спроведат каскадните обуки во различни временски интервали во периодот од септември – декември 2012 година.

 

Со цел реализација на обуката, Министерството за информатичко општество и администрација и Мисијата на ОБСЕ го објавуваат следниов

ОГЛАС
за селекција на 12 идни обучувачи во областа на законодавството
и изработка на прописите

 

На огласот може да се пријават лица со следниве квалификации:

  • Завршено високо образование во областа на правото, јавната администрација, креирањето на политики или други слични области;
  • Работно искуство од најмалку 3 години во областа на изработка и спроведување на прописите и регулаторниот менаџмент;
  • Успешно завршување на предвидената обука на обучувачи;
  • Практично искуство во изведување на обуки;
  • Добри презентациски и организациски способности; и
  • Познавање на англискиот јазик.

 

Начин на пријавување

Заинтересираните лица треба да поднесат куса биографија (не подолга од 2 страници) и писмо за мотивација (motivation letter) на македонски или на англиски јазик на следниве е-маил адреси:

 

Рок за пријавување

 

Потребните документи треба да се поднесат најдоцна до 14 мај 2012 година.

 

Идните обучувачи:

  • Задолжително ќе ја следат обуката за обучувачи, која ќе се спроведе на крајот на месец јуни 2012 година и која претставува предуслов за нивно ангажирање како обучувачи;
  • Ќе бидат селектирани и ангажирани за подготовка и спроведување на каскадните обуки за администрацијата во некоја од областите на регулаторниот менаџмент (врз основа на нивното искуство и претходно утврдената наставна програма за обуките) за која соодветно ќе бидат наградени;
  • Пред склучување на договор со ОБСЕ, ќе достават потпишана изјава со која ќе потврдат дека нивниот ангажман како обучувачи не спаѓа во рамки на нивните редовни работни обврски и дека обуката ќе ја спроведат вон работното време или во текот на одобрено отсуство;
  • Во случај кога обуките ќе се изведуваат надвор од Скопје, ќе им се обезбеди сместување и надомест на патните трошоци.
  • Ќе помогнат во осмислувањето и спроведувањето на курсот за учење на далечина (e-learning);
  • Во текот на ангажманот, тесно ќе соработуваат и ќе се координираат со останатите обучувачи и консултантите ангажирани на проектот, како и со претставниците на Министерството за информатичко општество и администрација и Мисијата на ОБСЕ во Скопје.